سكسوكه مسكسكه

شاهت الوجوه .... شااااهت الوجوووه ( تراني سمعتها بس مدري وش معناها ) ... الا والله شااااهت الوجووه ... يعني بدلتوا ثيابكم بملابس غريبه مريبه وبنطلونات تلاقي نص العكره طالعه قلنااا مااااعليه .... نزعتوا الشماغ نزعاً من فوق رؤسكم واستبدلتوها بقبعات غربيه تشوف الواحد تقل راسه كنه مواقف باصات النقل الجماعي وهم قلناااا ماااا عليه ... استبدلتوا المفطحات بالهوت دوق والمكدونالدز اللي تاكله تقول كنك تاكل قطو مجفف وقلنا مااااعليه .... سويتو قصه الاسد والعنز والجربوع والكابوريا والهدهد ابو قذله وما خليتو حيوااااان ما قلدتوا قصته ودائما الادنى يقلد الاعلى وقلنااا يله ماااا عليه ... اهلكتوا الحرث والنسل بسرعاتكم الجنونيه وتفحيطكم وايذائكم لخلق الله قلنا الموت حق ومقدر ومكتوب وما عليه بيهديهم الله ... تجمعتوا بالطرقات وفي زوايا المجمعات واذيتو ا المسلمين والمسلمات وقلنا بيهديهم الله مااااعليه
... لكن توصل فيكم المواصيل انكم تخربون رمز من رموز الكشخه والوجاهه الاجتماعيه والسكسوكه الطبقيه فهذه اللتي لا ارضاها ابدا ابدا البته ... ولو كان الامر بيدي لوضعت حلاق عند كل اشاره ومعه اثنين عساكر للقبض على اصحاب السكاسيك المقلده ونزعها بالخيط وحلاوة شمسا حتى ما يعودونها مره ثانيه .... ما دعاني لكتابه هذا الموضوع هو ما شاهدته في احد المجمعات من الشباب اصحاب البنطلونات هشك بشك والثياب المخصره وقلنااا ماااااا عليه ... لكن ما شاهدته ويبدو انها موضه دارجه هاليومين هي السكسوكات العجيبه والغريبه ... فواحد مخليها خط من منتصف برطمه الين تفاحه ادم وهذا النوع بسميه ( السكسوكه المخاطيه ) ... وواحد منزلها من الطرفين مع الشنب الى اسفل الرقبه ومن تحت براطمه وما حولها حالقها بقزازه وربي تقول كنه فيه ثعلبه وهذي بسميها ( سكسوكه الاجرب ) ... وفيه واحد مسوي دقنه خط من اسفل الفك ويوووووم وصل عند الشنب حلقها يعني نص دقن لنص رجال ... نعنبو شكلك وربي يا وجهك تقل صندل ضاربته الشمس ومدري من ضحك عليك وقال انك بتصير حلو .... اما الشنبات ياجماعه فالشباب ماشين تقل مستنسخينهم من هتلر وقالك ايه شنب فرنسي ... الا شنب قطو هذا اللي حاطينه كنه لزقه تحت خشومكم والباقي حالقينه ... نرجع للسكاسيك ياجماعه وياجماعه حرام عليكم صار الواحد لا طالع فيني اشعر انه يقول قم بس قم انت وسكسوكته هذي ايها الرجعي المتخلف عن ركب السكاسيك الحديثه وما صاحبها من تطور ... طيب بذمتكم اجل واحد وجهه اطول من يوم السبت وحالق دقنه ومطول السكسوكه يجي 10 سم تقل عنز مغوليه... حشا ذا مو وجه الا تقل مسطرة مهندس معماري ... فيا شباب ارحموا انفسكم وترى الفضاوه هي اللي خلتكم ما تدرون شتسون بخششكم ... فارحموا هذه الخشش يرحمكم الله واعيدو للسكسوكه هيبتها اللتي افتقدتها منذ ان بداتم بتشويه سمعتها ... والله يستر من التالي لا تقومون تنفخون براطمكم بالسيلكون .. بس هاه تراه سيلكون طبي مو سيلكون اللي يستخدمون السباكين .... وربنا الهادي ويصلح شباب المسلمين

وسلامتكم

عجبنى الموضوع قلت خليهم يشوفوه
هههههههههههههههههههه